Xitoyda portlash oqibatida 7 kishi halok bo‘ldi
Hozircha portlash sabablari rasman ma’lum qilinmagan.
Xitoyning janubidagi Guangsi Chjuan avtonom rayonida sodir bo‘lgan portlash oqibatida kamida 7 kishi halok bo‘ldi, yana 17 kishi turli darajadagi tan jarohatlari oldi. Bu haqda Sinxua axborot agentligi xabar berdi.
Ma’lumotlarga ko‘ra, hodisa Sin’an okrugi hududida yuz bergan. Voqea joyiga favqulodda xizmatlar va qutqaruv guruhlari jalb etilgan bo‘lib, qidiruv-qutqaruv ishlari davom ettirilmoqda.
Hozircha portlash sabablari rasman ma’lum qilinmagan. Mutasaddi idoralar tomonidan hodisa yuzasidan surishtiruv ishlari olib borilmoqda.
Eslatib o‘tamiz, joriy yil may oyida Xitoyning Changsha shahridagi pirotexnika mahsulotlari ishlab chiqaruvchi korxonada yuz bergan portlash oqibatida 26 kishi halok bo‘lgan, 61 kishi jarohatlangandi.
