Хитойда пиротехника заводидаги портлаш оқибатида камида 21 киши ҳалок бўлди
Хитой раиси Си Жинпин бедарак йўқолганларни топиш, жароҳатланганларни қутқариш ва ҳодиса айбдорларини жазолаш ҳақида топшириқ берди.
Хитойнинг Ҳунан провинцияси, Лиуянг шаҳридаги пиротехника заводида юз берган кучли портлаш оқибатида камида 21 киши ҳалок бўлди, 61 киши турли даражада жароҳат олди. Бу ҳақда BBC хабар берди.
Маълум қилинишича, ҳодиса душанба куни Huasheng Fireworks заводида содир бўлган. Портлашдан сўнг қутқарув хизматлари завод атрофидаги 3 километр радиусда жойлашган ҳудуддан аҳолини зудлик билан эвакуация қилган.
Қидирув-қутқарув ишларига қарийб 500 нафар ходим жалб этилган бўлиб, бинода қолиб кетганларни аниқлаш учун робот технологияларидан ҳам фойдаланилган. Расмийларга кўра, завод ҳудудидаги икки порох омбори қутқарув жараёнида юқори хавф манбаи бўлиб қолмоқда.
Ҳуқуқни муҳофаза қилувчи органлар портлаш сабабларини ўрганмоқда. Дастлабки маълумотларга кўра, пиротехника корхонаси раҳбарига нисбатан “назорат чоралари” қўлланган. Портлаш кучи яқин атрофдаги турар жойларга ҳам зарар етказган.
“Уйларимиздаги ойналар чилпарчин бўлди, алюминий ромлар эгилди, ҳатто зангламас пўлат эшиклар ҳам букилиб кетди”, — деган фуқаро.
Хитой раиси Си Жинпин ҳодиса юзасидан барча куч ва воситаларни сафарбар этиб, бедарак йўқолганларни қидириш ҳамда жароҳатланганларни қутқариш бўйича топшириқ берган. Шунингдек, у воқеа сабабларини чуқур ўрганиш ва айбдорларни жавобгарликка тортиш зарурлигини таъкидлаган.
Маҳаллий аҳолининг айтишича, портлаш оқибатида йўлларга тош ва чиқиндилар сочилиб кетган, айрим фуқаролар хавфсизлик нуқтаи назаридан ҳудудни тарк этган.
Лиуянг шаҳри пиротехника маҳсулотлари ишлаб чиқариш бўйича йирик марказлардан бири ҳисобланади. Хитойда бу каби корхоналарда юз берадиган портлашлар тез-тез учраб туради ва кўпинча оғир оқибатларга олиб келади. Жорий йил февраль ойида Ҳубей провинциясидаги пиротехника дўконида содир бўлган портлашда 12 киши ҳалок бўлган.
