Messi, Ronaldu va Yamal: JCh-2026’da rekordlar yangilanishi mumkin
JCh-2026’da gollar va ishtirokchilar soni bo‘yicha yangi rekordlar kutilmoqda.
AQSH, Kanada va Meksikada o‘tkazilayotgan 2026-yilgi futbol bo‘yicha Jahon chempionati musobaqa tarixidagi eng yirik turnir sifatida bir qator rekordlarning yangilanishiga sabab bo‘lishi mumkin.
Bu yil ilk bor mundialda 32 emas, 48 ta terma jamoa ishtirok etmoqda. Natijada turnir doirasidagi o‘yinlar soni ham sezilarli ravishda oshib, avvalgi 64 ta o‘yin o‘rniga 104 ta uchrashuv o‘tkaziladi.
Musobaqadagi o‘yinlar sonining ko‘payishi urilgan gollar bo‘yicha ham yangi rekord qayd etilishi ehtimolini oshirmoqda. Hozircha eng yuqori natija 1998 va 2014-yilgi Jahon chempionatlarida qayd etilgan 172 ta gol hisoblanadi.
2026-yilgi mundial yana bir tarixiy voqea bilan ahamiyatli. Turnir ilk bor uchta davlat — AQSH, Kanada va Meksika mezbonligida o‘tkazilmoqda. Shuningdek, Meksika Jahon chempionati o‘yinlariga uchinchi marta mezbonlik qilayotgan ilk mamlakatga aylandi.
Turnirda ishtirok etayotgan Lionel Messi va Krishtianu Ronaldu ham tarixiy rekord o‘rnatish imkoniyatiga ega. Ular futbol tarixida oltita Jahon chempionatida qatnashgan ilk futbolchilarga aylanishi mumkin.
Messi, shuningdek, Jahon chempionatlaridagi o‘yinlar soni bo‘yicha o‘z rekordini yanada yaxshilashi kutilmoqda. Argentinalik futbolchi hozirda mundiallarda o‘tkazgan 26 ta uchrashuv bilan ushbu ko‘rsatkich bo‘yicha yetakchilik qilmoqda.
Bundan tashqari, Mbappe va Messi germaniyalik afsonaviy hujumchi Miroslav Klosega tegishli Jahon chempionatlaridagi gollar rekordi — 16 ta gol natijasiga yaqinlashish imkoniyatiga ega.
Yana bir e’tibor markazidagi futbolchi — Lamin Yamal. 18 yoshli futbolchi mundialning eng yaxshi o‘yinchisi sovrinini qo‘lga kiritsa, ushbu mukofot tarixidagi eng yosh g‘olibga aylanishi mumkin.
Hozirda bu rekord 1986-yilgi Jahon chempionatining "Oltin to'p"ini 25 yoshida qo'lga kiritgan Diego Maradonaga tegishli.
