O‘zbekiston–Kolumbiya o‘yini uchun 74 mingdan ortiq chipta sotildi
18-iyun kuni bo‘lib o‘tadigan O‘zbekiston–Kolumbiya bahsiga qiziqish rekord darajaga yetdi.
2026-yilgi futbol bo‘yicha Jahon chempionatining guruh bosqichidan o‘rin olgan O‘zbekiston va Kolumbiya terma jamoalari o‘rtasidagi uchrashuv turnirning eng katta qiziqish uyg‘otayotgan o‘yinlaridan biriga aylandi.
Dastlabki ma’lumotlarga ko‘ra, mazkur bahs uchun hozirga qadar 74 ming 725 ta chipta sotilgan. Bu ko‘rsatkich JCh-2026 doirasida o‘tkaziladigan o‘yinlar orasida eng yuqori natija sifatida qayd etilmoqda.
Shu tariqa, O‘zbekiston ishtirokidagi uchrashuv chipta savdosi bo‘yicha Meksika – Janubiy Afrika o‘rtasidagi turnirning ochilish bahsi (73 373 ta) hamda Braziliya – Marokash uchrashuvi (73 719 ta) natijalaridan ham o‘zib ketdi.
Tarixiy bahs 18-iyun kuni Meksika poytaxtidagi afsonaviy “Asteka” stadionida bo‘lib o‘tadi. 81070 ta tomoshabinga mo‘ljallangan arena o‘rinlarining qariyb 92 foizi allaqachon band qilingan.
Ma’lumotlarga ko‘ra, o‘yinga bo‘lgan yuqori qiziqish sabab stadiondagi qolgan chiptalar ham tez orada sotib bo‘linishi kutilmoqda. Uchrashuv Toshkent vaqti bilan soat 07:00 da boshlanadi.
