Qarshi hokimi o‘rinbosari xodimlarni majburiy mehnatga jalb qilgani uchun 41 mln so‘m jarimaga tortildi
Tekshiruv natijasida Nurbek Turdiyev tomonidan xodimlar majburiy mehnatga jalb qilingani tasdiqlandi.
Qashqadaryo viloyatining Qarshi shahri hokimining birinchi o‘rinbosari xodimlarni dam olish kunlari ishga jalb qilgani uchun ma’muriy javobgarlikka tortildi. Bu haqda Davlat mehnat inspeksiyasi ma’lum qildi.
Qayd etilishicha, hokim o‘rinbosarining xodimlarni dam olish kunlari ishga majburan jalb qilgani hamda ularga nisbatan haqoratli munosabatda bo‘lgani haqidagi murojaat belgilangan tartibda o‘rganilgan.
Tekshiruv yakunlariga ko‘ra, majburiy mehnatga yo‘l qo‘yilgani o‘z tasdig‘ini topgan. Shu munosabat bilan mansabdor shaxsga nisbatan O‘zbekiston Respublikasi Ma’muriy javobgarlik to‘g‘risidagi kodeksining 51-moddasi asosida ma’muriy jarima qo‘llanilgan. Unga bazaviy hisoblash miqdorining 100 baravari (41 million 200 ming so‘m) miqdorida jarima belgilangan.
Bundan tashqari, xodimlarga nisbatan haqoratli munosabatda bo‘lingani yuzasidan uning xatti-harakatlarini Odob-axloq komissiyasida ko‘rib chiqish masalasi bo‘yicha Qashqadaryo viloyati hokimligiga taqdimnoma kiritilgan.
Davlat mehnat inspeksiyasi ish beruvchilarni mehnat qonunchiligi talablariga qat’iy rioya etishga chaqirdi.
