Toshkentda 34 kg narkotik moddalar bilan harakatlangan “Lasetti” to'xtatildi
Xorijdan kontrabanda yo‘li bilan olib kirilgan narkotiklar orasida qariyb 13 kg opiy va 21,6 kg gashish bo'lgan.
Toshkent shahrida o‘tkazilgan tezkor tadbir davomida 34 kilogrammdan ortiq giyohvandlik vositalarining noqonuniy aylanmasiga chek qo‘yildi.
Davlat xavfsizlik xizmati hamda Ichki ishlar organlari xodimlari hamkorligida o‘tkazilgan tadbirda poytaxtdagi “Qo‘yliq” bozori yaqinida shubhali tarzda to‘xtab turgan “Lasetti” rusumli avtomashina xolislar ishtirokida ko‘zdan kechirilgan.Bu haqda DXX Zamon.uzga xabar berdi.
Aniqlanishicha, transport vositasini Surxondaryo viloyatining Sariosiyo tumanida yashovchi, 1968-yilda tug‘ilgan va muqaddam sudlangan shaxs boshqargan. Avtomobilda, shuningdek, 1984-yilda Denov shahrida tug‘ilgan va hozirda Toshkent shahrida istiqomat qiluvchi fuqaro ham bo‘lgan.
Tekshiruv davomida avtomashina salonidagi yelim idish ichidan 30 ta o‘ramga joylashtirilgan jami 34 kilogramm 610 gramm og‘ir turdagi giyohvandlik vositalari aniqlanib, ashyoviy dalil sifatida rasmiylashtirib olingan. Musodara qilingan moddalar orasida 12 kilogramm 960 gramm opiy va 21 kilogramm 650 gramm gashish bo‘lgani ma’lum qilingan.
Dastlabki ma’lumotlarga ko‘ra, mazkur turdagi giyohvandlik vositalari mamlakat hududiga xorijdan kontrabanda yo‘li bilan olib kirilgan.
Holat yuzasidan DXX Tergov boshqarmasi tomonidan Jinoyat kodeksining tegishli moddalari bilan jinoyat ishi qo‘zg‘atilib, gumonlanuvchilarga nisbatan qamoq ehtiyot chorasi qo‘llanilgan.
Hozirda tergov doirasida ushbu jinoyatga aloqador boshqa shaxslarni aniqlash bo‘yicha tezkor-surishtiruv tadbirlari davom ettirilmoqda.
