Andijonda mansabdor shaxs va bank xodimi pora bilan ushlandi
Qurilish inspeksiyasi mansabdori 30 mln so‘m, bank menejeri esa 8 ming dollar bilan qo'lga tushdi.
Andijon viloyatida zarar miqdorini kamaytirish hamda kredit ajratish bilan bog‘liq ikki korrupsion holat fosh etildi. Bu haqda DXX Zamon.uz'ga xabar berdi.
Andijon shahridagi savdo do‘konida ichimlik suvidan noqonuniy foydalanish oqibatida davlatga qariyb 680 million so‘mlik zarar yetkazilgani yuzasidan dalolatnoma rasmiylashtirilgan. Qurilish va uy-joy kommunal xo‘jaligi sohasida hududiy nazorat qilish inspeksiyasining sho‘ba boshlig‘i mansabdor tanishlari orqali zarar miqdorini kamaytirib berish hamda ma’muriy choralar ko‘rilishida yordam berish evaziga do‘kon egasidan 30 million so‘m talab qilgan.
DXX, Iqtisodiy jinoyatlarga qarshi kurashish departamenti va ichki ishlar organlari xodimlari hamkorligida o‘tkazilgan tezkor tadbirda u so‘ralgan pul mablag‘ini olayotgan vaqtida ashyoviy dalillar bilan ushlangan.
Yana bir holatda, aksiyadorlik tijorat banklaridan birining Asaka tuman filiali Mahallabay ishlash bo‘limi bosh menejeri fuqaroga 3 milliard 650 million so‘m miqdorida kredit ajratilishida yordam berish evaziga 8 ming AQSH dollari talab qilgan.
Aniqlanishicha, u joriy yilning aprel-may oylarida fuqaro tomonidan berilgan 7 800 AQSH dollarini olgan, biroq va’da qilingan masalani hal qila olmagan. Keyinchalik pulning bir qismini — 1 ming AQSH dollarini qaytarayotgan vaqtida DXX va IIB xodimlari tomonidan qo‘lga olingan.
Hozirda har ikki holat yuzasidan jinoyat ishlari qo‘zg‘atilib, tergov harakatlari olib borilmoqda.
