AQSH Falastin futbol assotsiatsiyasi prezidentiga viza bermadi
Jibril Rajoub FIFA tomonidan Jahon chempionatiga taklif etilgan milliy futbol federatsiyalari rahbarlari qatoridan joy olgan, biroq viza masalasi hal etilmagan.
Falastin futbol assotsiatsiyasi (PFA) prezidenti Jibril Rajoubga 2026-yilgi futbol bo‘yicha Jahon chempionati doirasidagi tadbirlarda ishtirok etish uchun AQSh vizasi berilmagani ma’lum bo‘ldi.
Associated Press xabariga ko‘ra, Rajoub FIFA tomonidan Jahon chempionatiga taklif etilgan milliy futbol federatsiyalari rahbarlari qatoridan joy olgan. U musobaqa uchun akkreditatsiyadan ham o‘tgan, biroq AQShga kirish uchun zarur bo‘lgan viza masalasi hal etilmagan.
Hozirda Falastin futbol assotsiatsiyasi rahbari Meksika poytaxti Mexiko shahrida bo‘lib turibdi. U AQSh vizasi rad etilgan yoki hali rasmiylashtirilmagan federatsiya vakillari orasida ekani qayd etilgan.
Jibril Rajoub futbol vakillarining Jahon chempionati o‘yinlarida ishtirok etish imkoniyatidan mahrum etilishini adolatsizlik deb baholagan.
AQSh Davlat departamenti esa Rajoubning viza masalasi yuzasidan izoh berishdan bosh tortgan.
Ma’lumot uchun, Falastin terma jamoasi 2026-yilgi Jahon chempionatiga yo‘llanma olmagan bo‘lsa-da, FIFA an’anaviy ravishda milliy futbol federatsiyalari rahbarlarini musobaqaga taklif qiladi.
