Kelajakda Jahon chempionatida 64 ta terma jamoa ishtirok etishi mumkin

 

FIFA prezidenti Janni Infantino kelajakda Jahon chempionati ishtirokchilari sonini 64 ta jamoagacha oshirish imkoniyati muhokama qilinayotganini ma’lum qildi.

 

Uning so‘zlariga ko‘ra, FIFA avvalo 2026-yilgi mundialning 48 jamoali formatdagi natijalarini tahlil qiladi. Shundan so‘ng turnirni yanada kengaytirish masalasi yuzasidan qaror qabul qilinishi mumkin.

 

Infantino Braziliyaning CazeTV kanaliga bergan intervyusida FIFA dunyo futboliga yanada ko‘proq mamlakatlarni jalb etish maqsadida turli variantlarni ko‘rib chiqayotganini ta’kidlagan.

 

FIFA rahbari suhbat davomida ketma-ket uchinchi marta Jahon chempionatiga chiqa olmagan Italiya terma jamoasi haqida ham hazilomuz fikr bildirgan. U 64 jamoali formatda italiyaliklarning mundialga yo‘llanma olish imkoniyati oshishini aytib, kinoya tariqasida turnirni hatto 208 jamoagacha kengaytirish mumkinligini ham qo‘shimcha qilgan.

 

Ma’lumot uchun, Italiya terma jamoasi Yevropa saralash bosqichining pley-offida mag‘lub bo‘lib, 2026-yilgi Jahon chempionatiga yo‘llanma ololmagan. Shu tariqa, to‘rt karra jahon chempionlari ketma-ket uchinchi mundialni o‘tkazib yubormoqda.

 

Eslatib o‘tamiz, 2026-yilgi FIFA Jahon chempionati ilk bor 48 ta jamoa ishtirokida o‘tkazilmoqda. Musobaqaga AQSH, Kanada va Meksika mezbonlik qilmoqda. Turnir 11-iyunda start olgan bo‘lib, 19-iyulga qadar davom etadi.