O'zbekistonda kirayotgan yo'lovchi sumkasidan bo'g'ma ilon aniqlandi
“Navoiy” chegara bojxona postida yo'lbarssimon noyob ilon olib kirilishining oldi olindi.
Toshkent viloyatidagi “Navoiy” chegara bojxona postida yo‘lbarssimon bo'g'ma ilonni O‘zbekiston hududiga noqonuniy olib kirishga urinish fosh etildi. Bu haqda viloyat bojxona boshqarmasi matbuot xizmati xabar berdi.
Ma’lum qilinishicha, qo‘shni davlatdan piyoda kirib kelgan fuqaroga tegishli qo‘l sumkasi nazorat-rentgen uskunasi orqali tekshirilganida uning ichida tirik jonivor — ilon borligi aniqlangan.
Dastlabki ma’lumotlarga ko‘ra, aniqlangan jonivor yo‘lbars pitoni (yo‘lbarssimon bo‘g‘ma ilon) bo‘lib, ushbu tur Janubiy va Janubi-Sharqiy Osiyo hududlarida uchraydi. Mazkur ilon xalqaro muhofaza ostidagi turlar sirasiga kiradi va uni mamlakat hududiga olib kirish uchun CITES xalqaro ruxsatnomasi talab etiladi.
Biroq yo‘lovchi bojxona nazorati davomida ushbu jonivorni olib kirish uchun zarur bo‘lgan ruxsat etuvchi hujjatlarni taqdim eta olmagan.
Hozirda mazkur holat yuzasidan bojxona organlari tomonidan surishtiruv harakatlari olib borilmoqda.
Aniqlangan jonivor belgilangan tartibda Toshkent hayvonot bog‘iga topshirilgan bo‘lib, mutaxassislar uning holatini qoniqarli deb baholamoqda.
