Tailandda malika Phatchara Kittiyaphaning vafoti munosabati bilan 15 kunlik motam e’lon qilindi
Malika 2022-yil dekabr oyida sport mashg‘ulotlari vaqtida hushidan ketganidan so‘ng og‘ir ahvolda shifoxonaga yotqizilgan edi.
Tailand hukumati qirol Maha Vajiralongkornning to‘ng‘ich qizi malika Phatchara Kittiyaphaning vafoti munosabati bilan mamlakat bo‘ylab 15 kunlik motam e’lon qildi. Bu haqda mamlakat vazirlar mahkamasi matbuot xizmatiga tayanib TASS xabar berdi.
Mamlakat Vazirlar Mahkamasi ma’lumotiga ko‘ra, 12-iyundan boshlab barcha davlat idoralari, ta’lim muassasalari va boshqa rasmiy tashkilotlarda davlat bayroqlari yarim tushiriladi. Davlat xizmatchilari ham motam tartibiga rioya qiladi.
Qirollik saroyi malikaning 11-iyun kuni 47 yoshida vafot etganini ma’lum qilgan. U 2022-yil dekabr oyida sport mashg‘ulotlari vaqtida hushidan ketganidan so‘ng og‘ir ahvolda shifoxonaga yotqizilgan edi.
Shifokorlar tomonidan olib borilgan uzoq muddatli davolash jarayonlariga qaramay, joriy yil may oyida malikaning sog‘lig‘i keskin yomonlashgani, organizmga tarqalgan infeksiya hayotiy muhim a’zolarga salbiy ta’sir ko‘rsatgani haqida xabar berilgan.
Phatchara Kittiyapha Tailand qirollik oilasining faol vakillaridan biri bo‘lib, huquq, diplomatiya va ijtimoiy loyihalar yo‘nalishidagi faoliyati bilan tanilgan edi.
