Toshkentda haydovchi boshqa haydovchini tayoq bilan urmoqchi bo'ldi
Haydovchilar o‘rtasida yuz bergan mojaro bo‘yicha ma’muriy ish qo‘zg‘atilib, materiallar sudga yuborildi.
Toshkent shahrining Yashnobod tumanida ikki nafar haydovchi o‘rtasida yuzaga kelgan mojaro aks etgan videolar ijtimoiy tarmoqlarda keng tarqaldi.
Toshkent shahar IIBB ma'lum qilishicha, joriy yilning 12-iyun kuni Maxtumquli ko‘chasida Cobalt rusumli avtomashina haydovchisi, 1992-yilda tug‘ilgan D.D. hamda Nexia-3 rusumli avtomashina haydovchisi, 1998-yilda tug‘ilgan Sh.A. yo‘l talashish oqibatida o‘zaro tortishib qolgan.
Mojaro davomida haydovchilar transport vositalaridan tushib, yo‘lning qatnov qismida jamoat tartibini buzgan holda o‘zaro janjallashgan. Tarqalgan videolarda ulardan birining qo‘liga tayoq olgani ham aks etgan.
Holat yuzasidan Yashnobod tumani Ichki ishlar organlari xodimlari tomonidan fuqarolarga nisbatan Ma’muriy javobgarlik to‘g‘risidagi kodeksning 183-moddasi — “Mayda bezorilik” alomatlari bilan ma’muriy bayonnoma rasmiylashtirildi.
To‘plangan materiallar qonunchilikda belgilangan tartibda ko‘rib chiqish uchun jinoyat ishlari bo‘yicha tuman sudiga yuborilgan.
