Toshkentda xalqaro investitsiya forumi sabab ayrim ko‘chalarda harakat vaqtincha cheklanadi
Shuningdek, 16–18-iyun kunlari yuk avtomobillarining Toshkent shahriga kirishi ham vaqtincha taqiqlanadi.
16-iyun kuni Toshkent shahri V Toshkent xalqaro investitsiya forumiga mezbonlik qiladi. Shu munosabat bilan xavfsizlik choralarini ta’minlash maqsadida 16–18-iyun kunlari shaharning ayrim ko‘chalarida transport vositalari harakati vaqtincha cheklanadi.
IIV matbuot xizmatining ma’lum qilishicha, cheklovlar doirasida Islom Karimov ko‘chasining Sharof Rashidov va Furqat ko‘chalari oralig‘idagi qismi, shuningdek Maxtumquli, Temur Malik va Yangi O‘zbekiston ko‘chalari tutashgan ko‘prikdan Yangi O‘zbekiston hamda Istiqlol ko‘chalari chorrahasigacha bo‘lgan hududlarda transport harakati vaqti-vaqti bilan to‘xtatiladi.
Shuningdek, Islom sivilizatsiyasi markazi atrofidagi ayrim yo‘llarda ham harakat cheklovlari joriy etiladi. Jumladan, Sharof Rashidov va Abdulla Qodiriy ko‘chalari chorrahasidan boshlab Qorasaroy hamda Nurafshon ko‘chalari kesishmasigacha bo‘lgan yo‘nalishlarda transport vositalari harakati cheklanadi.
Tashkilotchilar tomonidan yo‘l harakati ishtirokchilari uchun aylanma yo‘nalishlar tashkil etilishi, tezkor xizmatlar transporti esa ushbu cheklovlardan mustasno bo‘lishi qayd etildi.
Shuningdek, forum kunlarida yuk avtomobillarining Toshkent shahriga kirishi ham vaqtincha cheklanadi. Ular harakati Toshkent viloyati aylanma yo‘llari orqali yo‘naltiriladi.
