Eron AQSH bilan memorandumni Trampning tug‘ilgan kunida imzolashni rad etdi
Tehron hujjat bo‘yicha yakuniy qaror hali qabul qilinmaganini bildirib, taqdim etilgan takliflarning siyosiy, huquqiy va texnik jihatlari o‘rganilayotganini ma’lum qildi.
Eron AQSH bilan urushni tartibga solish jarayonini boshlashga qaratilgan memorandumni 14-iyun kuni imzolashni rad etdi. Bu haqda Eron Tashqi ishlar vazirligi matbuot kotibi Ismoil Baqoiyga tayanib, DW xabar berdi.
Baqoiyning aytishicha, hujjat ertasi kuni imzolanmaydi, biroq yaqin kunlarda kelishuvga erishish ehtimoli saqlanib qolmoqda. Baqoyi qarshi tomonning “beqarorligi” sabab muzokaralar jarayoniga oid bayonotlarda ehtiyotkor bo‘lish zarurligini ta’kidladi.
TIV vakiliga ko‘ra, memorandum harbiy harakatlarni to‘xtatishga qaratilgan bo‘lib, hozircha Eronning yadroviy dasturi masalasi muzokaralar kun tartibiga kiritilmagan.
Eronning Islom inqilobi qo‘riqchilari korpusiga yaqin Fars agentligining yozishicha, Tehron memorandumning Donald Tramp tug‘ilgan kuni imzolanishini AQSHning siyosiy-ramziy tashabbusi sifatida baholamoqda va bunday ssenariyni qo‘llab-quvvatlamaydi.
Agentlik manbasiga ko‘ra, Eron hukumati memorandumni imzolash bo‘yicha yakuniy qaror qabul qilmagan va taqdim etilgan takliflarning siyosiy, huquqiy hamda texnik jihatlarini o‘rganishda davom etmoqda.
Avvalroq AQSH prezidenti Donald Tramp 11-iyun kuni Eron obyektlariga rejalashtirilgan zarbalar bekor qilinganini ma’lum qilib, Tehron bilan kelishuv 13–14-iyun kunlari imzolanishi mumkinligini bildirgandi.
O‘sha kuni Ismoil Baqoyi memorandumning asosiy qoidalari deyarli kelishib olinganini aytgan.
12-iyun kuni AQSH va Eron o‘rtasidagi muzokaralarda vositachilik qilayotgan Pokiston bosh vaziri Shahboz Sharif tinchlik bitimining yakuniy matni kelishib olinganini ma’lum qilgan, keyinroq esa yakuniy tasdiqlash yaqin 24 soat ichida amalga oshirilishi mumkinligini bildirgan edi.
