O‘zbekistonda kiberjinoyatchilar fuqarolarning 2 trln so‘mdan ortiq pulini talon-toroj qilgan — IIV
2025-yilda mamlakatda qayd etilgan barcha jinoyatlarning 49,6 foizi kiberjinoyatlar hissasiga to‘g‘ri kelgan.
O‘zbekistonda kiberjinoyatlar oqibatida fuqarolarning 2 trillion so‘mdan ortiq mablag‘i talon-toroj qilingan. Bu haqda Ichki ishlar vazirligi Kiberjinoyatchilikka qarshi kurash departamenti boshlig‘i Mirzoxon Zubaydullayev Senatning 13-iyun kungi yalpi majlisida ma’lum qildi.
Uning so‘zlariga ko‘ra, 2025-yilda mamlakatda qayd etilgan barcha jinoyatlarning 49,6 foizi kiberjinoyatlar hissasiga to‘g‘ri kelgan. Mazkur turdagi jinoyatlar soni 2021-yildan buyon izchil o‘sib bormoqda.
Ta’kidlanishicha, kiberjinoyatlarni sodir etish usullari ham murakkablashib bormoqda. So‘nggi yillarda ularning turlari 18 tadan 64 taga yetgan. Holatlarning 96 foizida elektron to‘lov tizimlari orqali kibero‘g‘irlik va kiberfiribgarlik sodir etilgan.
Senat majlisida Markaziy bank, Ichki ishlar vazirligi va Bosh prokuratura kiberjinoyatlarga qarshi kurashish bo‘yicha hamkorlikda maxsus tizimni yo‘lga qo‘ygani ma’lum qilindi. Ushbu tizim orqali fuqarolar murojaatidan so‘ng 24 soat ichida bank kartalarini bloklash va pul mablag‘lari harakatini to‘xtatish imkoniyati yaratilgan.
Vazirlik vakiliga ko‘ra, so‘nggi besh oy davomida 1,7 trillion so‘m mablag‘ning noqonuniy ravishda xorijga olib chiqib ketilishining oldi olingan. Shuningdek, jinoyatlarga aloqador bo‘lgan 10 ming 250 ta bank kartasi bloklangan.
Mirzoxon Zubaydullayevning bildirishicha, 2026-yilda kiberjinoyatlarni fosh etish ko‘rsatkichlari 3,5 barobarga, ularni aniqlash ishlari esa 5 barobarga yaxshilangan.
