Albaniya prezidenti 16–17-iyun kunlari rasmiy tashrif bilan O‘zbekistonda bo‘ladi
Tashrif dasturi doirasida Bayram Begay V Toshkent xalqaro investitsiya forumida ham ishtirok etadi.
Shavkat Mirziyoyevning taklifiga binoan Bayram Begay 16–17-iyun kunlari rafiqasi hamrohligida rasmiy tashrif bilan O‘zbekistonda bo‘ladi.
Tashrif doirasida Toshkent shahrida oliy darajadagi muzokaralar o‘tkazilishi rejalashtirilgan. Unda O‘zbekiston va Albaniya o‘rtasidagi ikki tomonlama hamkorlikni yanada rivojlantirish istiqbollari muhokama qilinadi.
Muzokaralarda savdo-iqtisodiy aloqalar, sanoat kooperatsiyasi, qishloq xo‘jaligi, “yashil” energetika, turizm hamda boshqa ustuvor yo‘nalishlardagi hamkorlikni kengaytirish masalalariga alohida e’tibor qaratiladi. Shuningdek, madaniy-gumanitar almashinuvlarni faollashtirish bo‘yicha takliflar ham ko‘rib chiqiladi.
Tomonlar xalqaro va mintaqaviy ahamiyatga ega dolzarb masalalar yuzasidan fikr almashib, ko‘p tomonlama platformalar doirasidagi hamkorlik va o‘zaro qo‘llab-quvvatlash istiqbollarini muhokama qiladilar.
Tashrif dasturiga muvofiq, Albaniya Prezidenti V Toshkent xalqaro investitsiya forumida ham ishtirok etadi.
