AQSh va Eron harbiy harakatlarni to‘xtatish bo‘yicha kelishuvga erishdi
Kelishuvni rasmiy imzolash marosimi 19-iyun kuni Jenevada o‘tkazilishi rejalashtirilmoqda.
AQSh va Eron o‘rtasida harbiy harakatlarni to‘xtatishni nazarda tutuvchi tinchlik kelishuvi bo‘yicha kelishuvga erishildi. Bu haqda Pokiston Bosh vaziri Shahboz Sharif ma’lum qildi.
Uning ta’kidlashicha, uzoq davom etgan va intensiv muzokaralar natijasida tomonlar barcha yo‘nalishlarda, jumladan Livan hududida ham harbiy harakatlarni darhol to‘xtatishga kelishib olgan.
Ma’lum qilinishicha, kelishuvni rasmiy imzolash marosimi 19-iyun kuni Jeneva shahrida bo‘lib o‘tishi rejalashtirilgan. Muzokaralarda vositachi sifatida qatnashgan Pokiston AQSh va Eronga, shuningdek, jarayonda ishtirok etgan Qatar, Saudiya Arabistoni va Turkiyaga minnatdorlik bildirgan.
AQSh prezidenti Donald Tramp ham Eron bilan kelishuv yakunlangani haqida ma’lum qilgan. U kelishuv doirasida Hormuz bo‘g‘ozini qayta ochish va mintaqadagi ayrim cheklovlarni bekor qilish masalalari ko‘rib chiqilganini bildirgan.
Eron Tashqi ishlar vaziri o‘rinbosari Kozim G'aribobodiy esa AQSh bilan kelishuv matni yakunlanganini tasdiqlab, hujjat Shveytsariyada imzolanishi kutilayotganini ma’lum qilgan.
Uning so‘zlariga ko‘ra, memorandum imzolangach, tomonlar 60 kun davomida yakuniy tinchlik shartnomasini ishlab chiqish bo‘yicha qo‘shimcha muzokaralar olib boradi. Shu davr mobaynida kelishuv bandlarining bajarilishi ustidan nazorat o‘rnatiladi.
Shuningdek, AQSh vitse-prezidenti J. D. Vance Jenevadagi imzolash marosimida ishtirok etishi mumkinligi ma’lum qilingan. Ayrim manbalarga ko‘ra, marosimda prezident Donald Trampning ham qatnashishi ehtimoldan xoli emas.
