FIFA avstraliyalik hakamni qo‘l ishorasi sabab tekshirmoqda
Uning translyatsiya vaqtida namoyish etilgan qo‘l ishorasi oq tanlilar ustunligini targ‘ib qiluvchi ramz sifatida talqin qilinmoqda.
FIFA 2026-yilgi Jahon chempionatida ishlayotgan avstraliyalik VAR hakami Shon Evansga nisbatan tekshiruv boshladi. Bunga Germaniya va Kyurasao terma jamoalari o‘rtasidagi uchrashuv oldidan translyatsiya vaqtida namoyish etilgan qo‘l ishorasi sabab bo‘lgan.
Xyustonda bo‘lib o‘tgan “E” guruhi uchrashuvi oldidan hakamlar brigadasi tomoshabinlarga tanishtirilayotgan paytda Evans o‘ng qo‘lining bosh va ko‘rsatkich barmoqlari bilan ishora qilgandek ko‘ringan.
Mazkur holat ijtimoiy tarmoqlarda keng muhokamalarga sabab bo‘lgan. Ayrim foydalanuvchilar ushbu ishorani oq tanlilar ustunligini targ‘ib qiluvchi ramz sifatida talqin qilgan bo‘lsa, boshqalar Evansni himoya qilib, bu Avstraliyada mashhur bo‘lgan “Circle Game” nomli oddiy hazil ekanini bildirishgan.
Ishoraning asl ma’nosi aniq bo‘lmasa ham futbol muhlislari hakamni turnirdan chetlatishga chaqirgan. Hozircha FIFA tekshiruv yuzasidan qo‘shimcha ma’lumot bermagan.
Ma’lumot uchun, Shon Evans FIFA 2026 Jahon chempionatiga jalb etilgan to‘rt nafar avstraliyalik hakamlardan biri hisoblanadi. U 2024-yilda Avstraliya Professional Futbol Hakamlari Assotsiatsiyasi tomonidan yil hakami deb topilgan. U, shuningdek, joriy mavsumda “Auckland” va “Sydney” jamoalari o‘rtasidagi A-Liga grand finalida VAR hakami sifatida faoliyat yuritgan.
Abdujalilov Doniyor tayyorladi
