Namangan shahrida renovatsiya doirasida 36 ta ko‘p qavatli uy buziladi
Dastur doirasida uylar buzilib, 92 ta yangi ko‘p qavatli uy va yuzlab xizmat ko‘rsatish obyektlari quriladi.
Prezident qarori bilan 2026–2030-yillarda Namangan shahrida renovatsiya dasturi amalga oshiriladigan hududlar tasdiqlandi.
Hujjatga ko‘ra, renovatsiya ishlari Navoiy, Ibrat va Uychi ko‘chalarida olib boriladi. Ushbu hududlarda 36 ta ko‘p qavatli uy, 143 ta yakka tartibdagi xonadon hamda 13 ta noturar obyekt buzilishi rejalashtirilgan.
Dastur doirasida jami 6 616 ta xonadonga mo‘ljallangan 92 ta ko‘p qavatli uy quriladi.
Shuningdek, 375 ta xizmat ko‘rsatish obyektini tashkil etish ko‘zda tutilgan.
Infratuzilmani yaxshilash maqsadida shaharda 2,3 kilometr asosiy yo‘l va 56 ming kvadrat metrdan ortiq ichki yo‘llar ta’mirlanadi. Bundan tashqari, 6,9 kilometr elektr tarmoqlari yangilanib, 45 ta transformator hamda 2 ta yangi qozonxona o‘rnatiladi. Suv ta’minoti tizimini yaxshilash ishlari ham amalga oshiriladi.
10-iyun kuni Prezident tomonidan “Shaharsozlik renovatsiyasi to‘g‘risida”gi qonun imzolangan edi. Qonunga ko‘ra, renovatsiya hududidagi turar va noturar joylarning eskirgani, yashash yoki foydalanish uchun yaroqsiz holga kelgani, avariya xavfi mavjudligi hamda hudud aholisining ijtimoiy hayotiga jiddiy ta’sir qiluvchi omillar renovatsiyani amalga oshirish uchun asos bo‘lib xizmat qiladi.
