Namanganda 1 kilogrammdan ortiq gashish olib ketayotgan shaxs qo‘lga olindi
Gumonlanuvchi moddalarni Toshkent shahridagi mijozlarga yetkazish va sotishni rejalashtirgan.
Giyohvandlik vositalarining noqonuniy aylanmasiga qarshi kurashish doirasida Davlat xavfsizlik xizmati va ichki ishlar organlari xodimlari tomonidan navbatdagi tezkor tadbir o‘tkazildi. Bu haqda DXX Zamon.uz'ga xabar berdi.
Tadbir davomida “Qo‘qon – Toshkent” yo‘nalishida harakatlanayotgan, 1995-yilda tug‘ilgan Toshkent shahrida yashovchi fuqaro boshqaruvidagi “Voyah” rusumli avtomashina Namangan viloyati Pop tumanidagi “Namangan” YPX maskanida to‘xtatilib, belgilangan tartibda ko‘zdan kechirilgan.
Tekshiruv jarayonida avtomashina salonidagi o‘rindiq ostiga yashirilgan qora rangli sellofan paket ichidan sof og‘irligi 1 kilogramm 178 gramm bo‘lgan “gashish” giyohvandlik vositasi hamda 8 dona “Regapen” nomli kuchli ta’sir qiluvchi dori vositasi aniqlanib, ashyoviy dalil sifatida rasmiylashtirilgan.
Dastlabki ma’lumotlarga ko‘ra, gumonlanuvchi ushbu noqonuniy moddalarni Toshkent shahridagi mijozlarga yetkazish va sotishni rejalashtirgan.
Mazkur holat yuzasidan unga nisbatan jinoyat ishi qo‘zg‘atilib, qamoq ehtiyot chorasi qo‘llangan. Hozirda tergov harakatlari davom ettirilmoqda.
