Namanganda maktab direktorligi uchun 10 ming dollar so‘ragan amaldor ushlandi
Shuningdek, davlat-xususiy sheriklik asosida bog‘cha ochish uchun yordam berish evaziga pul talab qilgan MTT xodimi qo'lga olindi.
Davlat xavfsizlik xizmati hamda Bosh prokuratura huzuridagi Departament tomonidan o‘tkazilgan tezkor tadbirlar davomida Namangan viloyati ta’lim tizimida bir qator korrupsion holatlar aniqlandi. Bu haqda DXX Zamon.uz'ga xabar berdi.
Ma’lum qilinishicha, Namangan viloyati Maktabgacha va maktab ta’limi boshqarmasining sho‘ba boshlig‘i To‘raqo‘rg‘on tumanida yashovchi fuqaroni Namangan shahridagi umumta’lim maktablaridan biriga direktor lavozimiga ishga joylashtirib berishni va’da qilib, buning evaziga 10 ming AQSH dollari talab qilgan.
U talab qilingan mablag‘ning 8,5 ming AQSH dollarini o‘z xizmat xonasida olgan vaqtida ashyoviy dalillar bilan qo‘lga olingan.
Tergovga qadar tekshiruvlarda mazkur mansabdor shaxs avval ham firibgarlik, mansab vakolatini suiiste’mol qilish, mansab soxtakorligi, pora olish hamda boshqa mansabdorlik jinoyatlari bo‘yicha sudlangan bo‘lishiga qaramay, noqonuniy faoliyatini davom ettirgani aniqlangan.
Yana bir holatda Namangan shahridagi maktabgacha ta’lim tashkiloti xodimi davlat-xususiy sheriklik asosida ikkita bog‘cha tashkil etishni rejalashtirgan tadbirkorga tegishli hujjatlar va shartnomalarni tasdiqlatib berishni va’da qilgan. U bu xizmat evaziga 2 ming AQSH dollari olgan vaqtida qo‘lga tushgan.
Tezkor tadbir davomida ushbu mablag‘ni olgan Davlatobod tumani Maktabgacha va maktab ta’limi bo‘limining bosh mutaxassisi ham fosh etilib, uning noqonuniy harakatlariga chek qo‘yilgan.
Hozirda har ikki holat yuzasidan jinoyat ishlari qo‘zg‘atilgan bo‘lib, tergov harakatlari davom ettirilmoqda.
