Samarqandda Damas dahshatli avariyaga uchradi
Haydovchi transport vositalarini quvib o‘tish maqsadida asfalt qoplamasi bo‘lmagan yo‘l chetidan yuqori tezlikda harakatlangan.
Samarqand viloyatida Damas avtomobili ishtirokida yo‘l-transport hodisasi sodir bo‘ldi. Oqibatda haydovchi turli tan jarohatlari olib, shifoxonaga yotqizilgan.
Yo‘l harakati xavfsizligi xizmati ma’lumotiga ko‘ra, hodisa 9-iyun kuni soat 18:10 atrofida Paxtachi tumanidagi “Mirza Olim” mahallasi hududidan o‘tuvchi M-37 avtomobil yo‘lining 138-kilometrida yuz bergan.
Aniqlanishicha, Damas haydovchisi o‘zidan oldinda harakatlanayotgan transport vositalarini quvib o‘tish maqsadida asfalt qoplamasi bo‘lmagan yo‘l chetidan yuqori tezlikda harakatlangan. Natijada u avtomobil boshqaruvini yo‘qotib, o‘zi bilan bir yo‘nalishda ketayotgan yuk mashinasining orqa qismiga borib urilgan.
YTH oqibatida Damas haydovchisi, 35 yoshli A. R. tan jarohatlari olib, tibbiyot muassasasiga olib borilgan.
Mazkur holat yuzasidan Paxtachi tumani Yo‘l harakati xavfsizligi bo‘limi tomonidan surishtiruv ishlari olib borilmoqda.
Eslatib o'tamiz, avvalroq Surxondaryoda Damas va Nexia o‘rtasidagi poyga oqibatida ikki kishi halok bo‘lgani haqida xabar berilgan edi.
