AQSh va Eron dastlabki sulh bitimini imzoladi

 

AQSh prezidenti Donald Tramp Qo‘shma Shtatlar va Eron o‘rtasida Fors ko‘rfazi mintaqasidagi mojaroni yumshatishga qaratilgan dastlabki kelishuv imzolanganini ma’lum qildi. Biroq tomonlar uzoq muddatli sulh bo‘yicha yakuniy kelishuvga hali erishmagan.

 

Reuters agentligi xabariga ko‘ra, yangi memorandum avvalroq e’lon qilingan sulh muddatini yana 60 kunga uzaytirishni nazarda tutadi. Shuningdek, hujjat Eron tomonidan cheklab qo‘yilgan Hormuz bo‘g‘ozi orqali kemalar harakatini tiklash uchun zamin yaratishi kutilmoqda.

 

Donald Trampning ta’kidlashicha, kelishuv to‘liq imzolangan bo‘lib, uning rasmiy marosimi Jenevada o‘tkazilishi rejalashtirilgan. AQSh vitse-prezidenti Jey Di Vens ham ushbu tadbirda ishtirok etishi kutilmoqda.

 

Shu bilan birga, Eron prezidenti Mas’ud Pezeshkian memorandumni harbiy harakatlarni to‘xtatish yo‘lidagi muhim qadam deb baholar ekan, uzoq muddatli sulh bo‘yicha yakuniy kelishuv hali ishlab chiqilmaganini qayd etgan.

 

AQSh rasmiylari memorandumda Eronga nisbatan sanksiyalarni yumshatish, ayrim aktivlarni muzlatishdan chiqarish hamda iqtisodiy tiklanishga ko‘maklashuvchi mexanizmlar nazarda tutilganini bildirgan. Buning evaziga Tehrondan yadroviy qurol dasturidan voz kechish va mintaqadagi qurolli guruhlarni qo‘llab-quvvatlashni to‘xtatish talab etilmoqda.

 

Reuters qayd etishicha, kelishuv mojaroning keskinlashuvini to‘xtatish yo‘lidagi muhim qadam sifatida baholanayotgan bo‘lsa-da, uning aniq shartlari va amaliy mexanizmlari hozircha to‘liq oshkor qilinmagan.