Jaloliddin Masharipov Jahon chempionatida ishtirok etmaydi
Uning o‘rniga milliy terma jamoaning yakuniy ro‘yxatiga Ruslanbek Jiyanov kiritildi.
O‘zbekiston milliy terma jamoasi futbolchisi Jaloliddin Masharipov jarohati sabab Jahon chempionatida maydonga tusha olmaydi.
Ma’lum qilinishicha, futbolchi uzoq muddat o‘yin amaliyotisiz qolgan va mashg‘ulotlarda to‘liq qatnasha olmagan. Tibbiy shtab tomonidan uning tiklanishi uchun zarur choralar ko‘rilib, individual tayyorgarlik dasturi asosida ish olib borilgan.
O‘tkazilgan tibbiy tekshiruvlar natijalari FIFA tibbiy qo‘mitasiga taqdim etilgan. O‘rganishlar yakuniga ko‘ra, qo‘mita Masharipovning mundialda ishtirok eta olmasligi haqida xulosa bergan.
Uning o‘rniga terma jamoaning yakuniy ro‘yxatiga Ruslanbek Jiyanov kiritildi.
