Jurnalistlar uyushmasi aʼzolari qayta ko‘rib chiqiladi

O‘zbekiston Jurnalistlar uyushmasiga OAV va media vakillarini aʼzolikka qabul qilish va shu davrga qadar aʼzo qilinganlar ro‘yxatini qayta ko‘rib chiqish ishlari olib borilmoqda. Shuhrat Oripov rahbar sifatida ish boshlaganidan so‘ng Uyushmaga aʼzolik masalasini tubdan qayta ko‘rib chiqish tashabbusini qo‘tardi. Xususan, ayni paytga qadar 2 ming atrofidagi aʼzolarning 70 foizini 60 yoshdan oshganlarni tashkil etib, shundan bir qancha vafot etganlar ham mavjud. O‘zbek mediasida o‘z ishining ustasi bo‘lgan, professional va uzoq yillik tajribaga taniqli shaxslar, shuningdek, jurnalsitikada faol bo‘lgan qalami o‘tkir yoshlarning Uyushmaga aʼzo qilinmagani qayd etildi. Shunga ko‘ra, Uyushmada Jurnalist va media vakillarini aʼzolikka qabul qilish bo‘yicha Komissiya ish boshladi va yangi Nizom ishlab chiqildi.

Endilikda o‘zbek jurnalistikasining taraqqiyotiga o‘z ijodiy materiallari bilan hissa qo‘shayotgan O‘zbekiston Respublikasi fuqarosi bo‘lgan, 22 yoshga to‘lgan va Uyushma faoliyatida ishtirok etayotgan shaxslar aʼzosi bo‘lishi mumkin qilib belgilandi. Shuningdek, kamida 3 yillik mehnat staji talab etiladi. Bundan tashqari sohada 20 yildan ortiq mehnat qilgan kadrlardan hujjatlar topshirilishda tavisyanomalar so‘ralmaydi.

Ushbu Nizom asosida ish olib borayotgan Komissiya maʼlumotlariga ko‘ra, joriy bir oy ichida Respublika bo‘ylab 200 dan ortiq soha vakili Uyushmaga qabul qilish bo‘yicha hujjat topshirdi. Ishchi guruh tomonidan hujjatlar o‘rganilib, 4 nafar nomzodga rad javobi berilgan.

Qayd etilishicha, Uyushmaga aʼzolikka qabul qilinish endilikda faqat o‘zi nomi bilan qolib ketmaydi. Aʼzolarning sohadagi faoliyati, Uyushma va jamiyatdagi voqea-hodislarga nisabatan faolligi eʼtiborga olinadi. Shunga ko‘ra, doimiy ravishda aʼzolar ro‘yxati o‘rganib boriladi, nomunosiblarni aʼzolikdan chiqarish bo‘yicha qaror qabul qilinadi.

Eʼtiborli jihati shundaki, Uyushma aʼzosi bo‘lgan jurnalistika sohasi vakillari tom maʼnoda Uyushma himoyasidagi shaxslarga aylandi. Ularga yangi imtiyozlar berish masalalari ham ko‘rib chiqilmoqda. Xususan, Uyushma qoshida tashkil etilishi kutilayotgan ijtimoiy-psixologik markazdan faqatgina Uyushmaga aʼzo bo‘lganlargina foydalanadi. Ular sud bilan bog‘liq holatlarda bepul advokatlar bilan taʼminlanadi. Shuningdek, salomatliklarini tiklash uchun bir nechta sihatgohlarga bepul yo‘llanmalar berish yo‘lga qo‘yilmoqda. Bundan tashqari endilikda O‘zbekiston jurnalistlariga berilishi kutilayotgan har qanday moddiy yordam va imtiyozlardan foydalanishda, davlat mukofotlariga tavsiyalar berishda, xorijiy davlatlarda malaka oshirish jarayonlariga avvalo Uyushma aʼzolariga ustunlik beriladi.