MB O‘zbekiston MTJning JCH-2026 ga chiqishi munosabati bilan oltin va kumush tangalar chiqaradi

O‘zbekiston Markaziy banki milliy terma jamoaning futbol bo‘yicha jahon chempionatiga ilk bor yo‘l olgani munosabati bilan maxsus esdalik tangalarini muomalaga chiqaradi.

 

Markaziy bank matbuot xizmatining ma’lum qilishicha, 2026-yilgi mundial yo‘llanmasi mamlakat sporti tarixidagi eng muhim voqealardan biri sifatida baholanmoqda. Ushbu yutuqni tarixga muhrlash maqsadida 999,9 asllikdagi sof oltin va kumushdan esdalik tangalari zarb etilgan.

 

Qayd etilishicha, og‘irligi 31,1 gramm bo‘lgan 100 dona oltin va 1000 dona kumush tanga cheklangan miqdorda ishlab chiqarilgan. Esdalik tangalari 18-iyundan boshlab respublika bo‘ylab 690 ta tijorat banki filiallarida sotuvga chiqariladi.

 

Tangalarning sotuv narxi hamda banklardagi mavjudligi to‘g‘risidagi yangilangan ma’lumotlar Markaziy bankning rasmiy platformalarida muntazam e’lon qilib boriladi.

 

 

Ma’lum qilinishicha, tangalarning avers qismida O‘zbekiston futbol assotsiatsiyasi logotipi, futbol to‘pi tasviri hamda “Tarixiy zafar. O‘zbekiston futboli jahon chempionatida — 2026” yozuvi aks ettirilgan. Shuningdek, unda “O‘zbekiston Respublikasi Markaziy banki” yozuvi va 100 ming so‘mlik nominal qiymat ham ko‘rsatilgan.

 

Konsepsiyaga ko‘ra, ushbu elementlar milliy terma jamoaning jahon chempionatiga ilk bor yo‘llanma olgani va O‘zbekiston futboli tarixida yangi sahifa ochilganini ramziy ifodalaydi.

 

Tangalar dizaynida muxlislar orasida “Oq bo‘rilar” nomi bilan tanilgan milliy terma jamoa ramzi ham aks etgan. Revers qismidagi bo‘ri silueti futbolchilarning shijoati, jamoaviy ruhi va matonatini ifodalashi qayd etilgan.

 

Shuningdek, dizaynda milliy terma jamoa liboslaridagi naqshlardan foydalanilgan. Markaziy bankga ko‘ra, ushbu naqshlar tarixiy obidalar bezaklaridan ilhomlangan bo‘lib, mamlakatning boy madaniy merosi va shonli tarixini aks ettiradi.

 

 

Esdalik tangalari uchun futbol maydonini eslatuvchi maxsus quti ham ishlab chiqilgan. Qutining markaziy qismiga tanga joylashtiriladi.

 

Markaziy bank ushbu tangalar yuqori badiiy va kolleksion qiymatga ega ekanini hamda cheklangan miqdorda chiqarilganini ta’kidladi.