O‘zbekiston va Qozog‘istonda migrantlarni qabul qilish markazlari bo‘yicha kelishuvlar yo‘q — YI
Yevropa Ittifoqi Markaziy Osiyoda migrantlar markazlarini ochish yuzasidan hozircha hech qanday muzokaralar olib borilmaganini ma’lum qildi.
Yevropa Ittifoqining Markaziy Osiyo bo‘yicha maxsus vakili Eduards Stiprais Qozog‘iston va O‘zbekiston hududida migrantlarni qabul qilish markazlarini tashkil etish masalasi bo‘yicha hech qanday muzokaralar olib borilmaganini ma’lum qildi deydi TASS.
Uning ta’kidlashicha, Yevropa Ittifoqi Ostona va Toshkent bilan Yevropa mamlakatlarida boshpana olish huquqiga ega bo‘lmagan migrantlarni joylashtirish uchun maxsus markazlar yaratish yuzasidan muzokaralar o‘tkazmagan va bunday jarayon hozirda ham mavjud emas.
“Bunday muzokaralar bo‘lmagan va hozir ham olib borilmayapti”, — degan Stiprais.
Shu bilan birga, u Yevropa Ittifoqi darajasida nazariy jihatdan shunday markazlarni tashkil etish imkonini beruvchi qonunchilik qabul qilinganini qayd etgan. Biroq hozircha bu borada aniq amaliy qarorlar yoki kelishuvlar mavjud emas.
Avvalroq Politico nashri diplomatik manbalarga tayanib, ayrim Yevropa davlatlari migrantlarni qaytarish va boshpana so‘rovlarini ko‘rib chiqish markazlarini Yevropa Ittifoqidan tashqarida tashkil etish imkoniyatlarini o‘rganayotgani haqida xabar bergan edi. Nashrda Qozog‘iston va O‘zbekiston ehtimoliy joylashuv hududlari sifatida tilga olingan.
Biroq keyinchalik ham Qozog‘iston, ham O‘zbekiston rasmiylari bu masala yuzasidan Yevropa Ittifoqi bilan muzokaralar olib borilayotganini rad etgan.
