Toshkent viloyatida qidiruvdagi shaxsning uyidan yirik miqdordagi narkotik topildi
Shuningdek, Samarqandda narkotik moddalarni 10 ming dollarga sotayotgan shaxslar ushlandi.
Giyohvandlik vositalarining noqonuniy aylanmasiga qarshi kurashish doirasida Davlat xavfsizlik xizmati, Bojxona organlari, Chegara qo‘shinlari hamda Ichki ishlar organlari hamkorligida Toshkent va Samarqand viloyatlarida o‘tkazilgan tezkor tadbirlar davomida yirik miqdordagi narkotik moddalar musodara qilindi. Bu haqda DXX Zamon.uz'ga xabar berdi.
Toshkent viloyatining Bekobod shahrida o‘tkazilgan tezkor tadbirda Jinoyat kodeksining kontrabanda hamda giyohvandlik vositalari bilan bog‘liq moddalari bilan nazarda tutilgan jinoyatlarni sodir etganlikda gumon qilinib, 2025-yildan buyon qidiruvda bo‘lgan 1992-yilda tug‘ilgan shaxs ushlandi.
U tomonidan ijaraga olingan xonadon xolislar ishtirokida ko‘zdan kechirilganda, oshxonadagi muzlatgich ichidan 151 gramm “opiy”, hojatxona shaxtasidan esa 4 kilogramm 971 gramm “gashish” moddasi topildi va protsessual tartibda rasmiylashtirildi.
Dastlabki ma’lumotlarga ko‘ra, ushbu narkotik moddalar qo‘shni davlatdan kontrabanda yo‘li bilan olib kirilgan. Gumonlanuvchiga nisbatan “qamoq” ehtiyot chorasi qo‘llanilgan.
Samarqand viloyatining Urgut tumanida o‘tkazilgan tezkor tadbirda esa 2003-yilda tug‘ilgan ikki nafar fuqaro shartli xaridorga 932 gramm “gashish” va 2,5 gramm “opiy” moddasini 10 ming AQSH dollariga sotayotgan vaqtida ashyoviy dalillar bilan qo‘lga olindi.
Mazkur holat yuzasidan jinoyat ishi qo‘zg‘atilib, gumonlanuvchilarga nisbatan “qamoq” ehtiyot chorasi qo‘llangan. Hozirda tergov harakatlari davom ettirilmoqda.
