Toshkentda 9-sinf bitiruvchisi boshqargan BYD avtobusga urildi
U avtomobilning davlat raqamini yechgan holda harakatlangan.
Toshkent shahrida 9-sinfni bitirgan o‘smir boshqargan BYD rusumli avtomobil yo‘l-transport hodisasiga uchradi. Bu haqda IIV Yo‘l harakati xavfsizligi xizmati ma’lum qildi.
Qayd etilishicha, hodisa 15-iyun kuni ertalab sodir bo‘lgan. Toshkentdagi 64-maktabning 9-sinfini bitirgan ikki nafar sinfdosh davlat raqami yechib qo‘yilgan BYD avtomobilida yo‘lga chiqqan.
Haydovchilik huquqiga ega bo‘lmagan o‘smir transport vositasi boshqaruvini yo‘qotib, Yutong rusumli yo‘lovchi avtobusining orqa qismiga urilgan.
YHXX ma’lumotiga ko‘ra, hodisa vaqtida avtobusda yo‘lovchilar bo‘lmagan va YTH oqibatida hech kim tan jarohati olmagan.
O‘smirning otasi farzandi ertalab oila a’zolarining ruxsatisiz uyga tegishli avtomobilni olib chiqib ketganini bildirgan.
Holat yuzasidan transport vositasini hujjatsiz boshqarishga yo‘l qo‘yganligi uchun o‘smirning otasiga nisbatan ma’muriy bayonnoma rasmiylashtirilgan.
