Toshkentda Lacetti va BYD to‘qnashuvi oqibatida uch kishi halok bo‘ldi
Lacetti haydovchisi chorrahada keskin chapga burilib, qarama-qarshi yo‘nalishdagi avtomobil bilan to‘qnashgan. BYD’ni voyaga yetmagan shaxs boshqargan.
Toshkent shahrining Uchtepa tumanida Lacetti va BYD avtomobillari ishtirokida sodir bo‘lgan yo‘l-transport hodisasi oqibatida uch kishi vafot etdi. Bu haqda “Millar” dasturida ma’lum qilindi.
Qayd etilishicha, hodisa 16-iyun kuni soat 03:10 atrofida Toshkent halqa avtomobil yo‘lining Uchtepa tumanidagi chorrahasida yuz bergan.
Dastlabki ma’lumotlarga ko‘ra, 2002-yilda tug‘ilgan haydovchi boshqaruvidagi Lacetti avtomobili chorrahada keskin chapga burilgan. Shu vaqtda qarama-qarshi yo‘nalishda harakatlanib kelayotgan BYD avtomobili bilan to‘qnashuv sodir bo‘lgan.
Aniqlanishicha, BYD avtomobilini 2010-yilda tug‘ilgan, haydovchilik guvohnomasiga ega bo‘lmagan voyaga yetmagan shaxs boshqargan.
YTH oqibatida Lacetti haydovchisi hamda 1999 va 2004-yillarda tug‘ilgan ikki nafar yo‘lovchi og‘ir tan jarohatlari olib, voqea joyida vafot etgan.
Voqea joyidan olingan tasvirlarda zarba kuchli bo‘lgani va yo‘l bo‘ylab avtomobil qismlari sochilib ketgani aks etgan. Guvohlarning aytishicha, to‘qnashuv oqibatida yo‘l chetidagi bekat konstruksiyasiga ham shikast yetgan.
Mazkur holat yuzasidan Toshkent shahar IIBB Tergov boshqarmasi tomonidan Jinoyat kodeksining 266-moddasi 2-qismi (transport vositalari harakati yoki ulardan foydalanish xavfsizligi qoidalarini buzish) bilan jinoyat ishi qo‘zg‘atilgan.
Hozirda hodisaning barcha tafsilotlarini aniqlash yuzasidan tergov harakatlari olib borilmoqda.
