AQSh Senati Eron bilan urushni to‘xtatish haqidagi rezolyutsiyani yana rad etdi
47 senator rezolyutsiyani qo‘llab-quvvatlagan bo‘lsa, 48 nafari unga qarshi ovoz bergan.
AQSh Senati prezident ma’muriyatiga Eronga qarshi harbiy harakatlarni to‘xtatishni nazarda tutuvchi rezolyutsiyani navbatdagi ovoz berishda ham rad etdi.
Kongress yuqori palatasida o‘tkazilgan protseduraviy ovoz berishda hujjatni 47 nafar senator qo‘llab-quvvatlagan bo‘lsa, 48 nafari unga qarshi ovoz bergan. Respublikachilar partiyasining to‘rt nafar vakili rezolyutsiyani yoqlab ovoz bergan, Demokratlar partiyasidan esa bir senator hujjatga qarshi chiqqan.
Mazkur tashabbus AQSh prezidentining Eronga qarshi harbiy kuch ishlatishini Kongress roziligisiz cheklashni nazarda tutadi. AQSh Konstitutsiyasiga ko‘ra, urush e’lon qilish vakolati Kongressga tegishli bo‘lsa-da, so‘nggi o‘n yilliklarda Amerika prezidentlari xorijdagi harbiy operatsiyalarni boshlash bo‘yicha vakolatlarini keng talqin qilib kelmoqda.
Shu bois Kongressning ayrim a’zolari prezident Donald Tramp ma’muriyatidan Eronga qarshi harbiy kuch ishlatish masalasida qonunchilar roziligini olishni talab qiluvchi bir qator rezolyutsiyalarni ilgari surgan. Biroq, hozirgacha bunday tashabbuslarning birortasi ham Kongressning ikkala palatasidan to‘liq o‘ta olmagan.
Avvalroq AQSh, Eron va vositachi davlat sifatida Pokiston vakillari Yaqin Sharqdagi mojaroni tugatishga qaratilgan kelishuvga erishilganini tasdiqlagan edi. Tomonlar o‘rtasidagi rasmiy imzolash marosimi 19-iyun kuni Jenevada o‘tkazilishi rejalashtirilgan.
