“Bu butun mintaqa uchun tarixiy voqea” — Qardosh davlatlar rahbarlari O‘zbekiston terma jamoasiga omad tiladi
Qozog‘iston, Qirg‘iziston va Tojikiston fuqarolari ham O‘zbekiston terma jamoasiga muxlislik qilayotgani ta’kidlandi.
Toshkentda bo‘lib o‘tgan uchrashuvlar chog‘ida Ozarbayjon Bosh vaziri Ali Asadov, Tojikiston Bosh vaziri Qohir Rasulzoda hamda Qirg‘iziston Vazirlar Mahkamasi raisi Odilbek Qosimaliyev futbol bo‘yicha Jahon chempionatida ilk bor ishtirok etayotgan O‘zbekiston milliy terma jamoasiga muvaffaqiyat tiladilar.
Shavkat Mirziyoyev bilan uchrashuvlar davomida qardosh davlatlar hukumat rahbarlari O‘zbekiston terma jamoasi nafaqat mamlakat, balki butun mintaqa sharafini himoya qilayotganini ta’kidlab, jamoaga o‘z qo‘llab-quvvatlovlarini bildirdilar.
Ozarbayjon Bosh vaziri Ali Asadov O‘zbekistonning Jahon chempionatiga yo‘l olishini tarixiy muvaffaqiyat deb atab, Ozarbayjon xalqi terma jamoaga muxlislik qilishini ma’lum qildi.
Shuningdek, qardosh davlatlar rahbarlari O‘zbekistonning Kolumbiyaga qarshi uchrashuvida muvaffaqiyat qozonishiga ishonch bildirib, AQShda yashayotgan Qozog‘iston, Qirg‘iziston va Tojikiston fuqarolari ham O‘zbekiston terma jamoasini qo‘llab-quvvatlayotganini qayd etdilar.
Ularning ta’kidlashicha, O‘zbekistonning Jahon chempionatidagi ishtiroki nafaqat MDH hududi, balki butun mintaqa uchun muhim va tarixiy voqea hisoblanadi.
