O‘zbekiston yerosti boyliklari qiymati 3 trln dollar deb baholandi
Ushbu sohadagi imkoniyatlarni xorijiy investorlarga taqdim etish maqsadida ochiq raqamli geologiya ma’lumotlar bazasi yaratiladi.
O‘zbekiston sanoatning barcha tarmoqlarida yangi texnologik bosqichga o‘tish va yuqori qo‘shilgan qiymat yaratishga qaratilgan yirik dasturlarni amalga oshirmoqda. Bu haqda Prezident Shavkat Mirziyoyev investitsiya forumidagi nutqida ma’lum qildi.
Davlat rahbarining ta’kidlashicha, O‘zbekiston oltin, mis, uran, volfram, gaz va boshqa strategik xomashyo zaxiralariga boy bo‘lib, yer osti boyliklarining umumiy qiymati 3 trillion dollarga baholanadi.
Ushbu sohadagi imkoniyatlarni xorijiy investorlarga taqdim etish maqsadida ochiq raqamli geologiya ma’lumotlar bazasi yaratiladi. Shuningdek, auksionga chiqariladigan konlar soni to‘rt barobarga oshiriladi.
Prezidentning qayd etishicha, xomashyoni chuqur qayta ishlash va tayyor mahsulot ishlab chiqarishga qaratilgan loyihalarni rivojlantirish uchun Toshkent va Samarqandda tashkil etilayotgan “Kelajak metallari” texnoparklariga xorijiy investitsiyalar faol jalb etiladi.
Bundan tashqari, mashinasozlik, robototexnika, yengil sanoat, qurilish materiallari, elektrotexnika va farmatsevtika kabi ustuvor tarmoqlarda umumiy qiymati 20 milliard dollarlik investitsiya loyihalarini hamkorlikda amalga oshirish taklif etildi.
