O‘zbekistonda uy-joy qurilishi ikki barobarga oshiriladi
Andijon, Namangan va Samarqand milliondan ortiq aholi yashaydigan shaharlarga aylantiriladi.
Toshkent xalqaro investitsiya forumining yalpi majlisida Shavkat Mirziyoyev hududlarni rivojlantirish va shaharsozlik sohasidagi ustuvor vazifalar hamda yirik loyihalarni ma'lum qildi.
Davlat rahbari ta’kidlaganidek, O‘zbekiston aholisi soni 40 million nafarga yaqinlashib borayotgani uy-joy qurilishi, muhandislik infratuzilmasini rivojlantirish va shaharlarni kengaytirish bo‘yicha keng ko‘lamli dasturlarni amalga oshirishni talab etmoqda.
Shu munosabat bilan 2040-yilgacha mamlakatda quriladigan uy-joylar sonini ikki barobarga oshirish rejalashtirilgan. Natijada urbanizatsiya darajasini amaldagi 51 foizdan 65 foizga yetkazish maqsad qilingan.
Prezident poytaxtga tutash hududda 2 million aholiga mo‘ljallangan zamonaviy “Yangi Toshkent” megapolisi barpo etilayotganini qayd etdi.
Shuningdek, Andijon, Namangan va Samarqand shaharlarini milliondan ortiq aholi yashaydigan yirik megapolislarga aylantirish bo‘yicha loyihalar boshlangan.
Bundan tashqari, infratuzilma obyektlarini rivojlantirish maqsadida umumiy qiymati 27 milliard dollarlik davlat-xususiy sheriklik loyihalarini amalga oshirishga tayyorlik bildirilgani ta’kidlandi.
