Saida Mirziyoyeva AQSh moliya institutlari rahbarlari bilan uchrashdi
Muloqotda qo‘shma investitsiya platformasini rivojlantirish mavzusiga alohida e’tibor qaratildi.
Toshkent xalqaro investitsiya forumi doirasida Prezident administratsiyasi rahbari Saida Mirziyoyeva AQSh Eksimbanki prezidenti Jon Yovanovich hamda Xalqaro moliyaviy taraqqiyot korporatsiyasi bosh ijrochi direktori Ben Blek bilan uchrashuv o‘tkazdi.
Saida Mirziyoyevaning ma’lum qilishicha, muloqot chog‘ida sanoat va moliya sohalaridagi amaldagi hamda istiqboldagi loyihalarni kengaytirish masalalari muhokama qilingan.
Tomonlar, shuningdek, qo‘shma investitsiya platformasini rivojlantirish istiqbollariga alohida e’tibor qaratgan.
Uning ta’kidlashicha, Toshkent investitsiya forumi O‘zbekistonning xorijiy hamkorlari bilan amaldagi loyihalar yuzasidan rejalarni muvofiqlashtirish uchun muhim maydon vazifasini o‘tamoqda.
Saida Mirziyoyeva AQSh vakillari O‘zbekistondagi biznes imkoniyatlari bilan bir qatorda mamlakatning boy tarixi va madaniyatiga ham katta qiziqish bildirayotganini qayd etdi.
