Namanganda qariyb 4 kilogramm gashish moddasi musodara qilindi
Narkotik qo‘shni davlatdan aylanma yo‘llar orqali olib kirilgan.
Davlat xavfsizlik xizmati Namangan viloyati boshqarmasi hamda viloyat Bojxona boshqarmasi xodimlari hamkorligida o‘tkazilgan tezkor tadbir davomida yirik miqdordagi giyohvandlik vositalarining noqonuniy muomalasiga chek qo‘yildi. Bu haqda DXX Zamon.uz'ga xabar berdi.
Ma’lum qilinishicha, “Toshkent – Namangan” yo‘nalishida harakatlanayotgan “Cobalt” rusumli avtomobil Pop tumanidagi “Namangan” YPX maskanida to‘xtatilib, belgilangan tartibda ko‘zdan kechirilgan. Tekshiruv jarayonida transport vositasida yo‘lovchi sifatida ketayotgan Namangan shahrida yashovchi, 1989-yilda tug‘ilgan va muqaddam sudlangan fuqaroga tegishli sumkadan 3 kilogramm 956 gramm “gashish” moddasi aniqlanib, ashyoviy dalil sifatida rasmiylashtirib olingan.
Tergovga qadar tekshiruv davomida ushbu shaxs mazkur giyohvandlik vositasini o‘zining 1989-yilda tug‘ilgan, muqaddam sudlangan hamshahari bilan oldindan til biriktirgan holda qo‘shni davlatdan aylanma yo‘llar orqali olib kirgani aniqlangan. Ikkinchi gumonlanuvchi ham protsessual tartibda qo‘lga olingan.
Hozirda mazkur shaxslarga nisbatan jinoyat ishi qo‘zg‘atilib, tergov harakatlari olib borilmoqda.
