Toshkent viloyatida 9 nafar ekologiya mas’uli lavozimidan olindi

Toshkent viloyatida ekologik nazorat sohasida yo‘l qo‘yilgan kamchiliklar tanqid qilinib, qator mas’ullarga nisbatan intizomiy choralar qo‘llanildi.

 

Ekologiya va iqlim o‘zgarishi milliy qo‘mitasi raisi, Ekopolitsiya boshlig‘i Aziz Abduhakimov raisligida o‘tkazilgan kengaytirilgan yig‘ilishda viloyatda atrof-muhitni muhofaza qilish va ekologik nazoratni tashkil etishdagi kamchiliklar muhokama qilindi.

 

Yig‘ilishda ekologik nazoratning sust olib borilgani, ayrim xo‘jalik yurituvchi subyektlar faoliyati ustidan yetarli nazorat o‘rnatilmagani, ekologik ekspertiza xulosasisiz hamda daryo muhofaza zonalarida ruxsatsiz faoliyat yuritayotgan obyektlarga nisbatan choralar ko‘rilmagani qayd etildi. 

 

Shuningdek, Chirchiq daryosi o‘zanida noqonuniy qum-shag‘al qazib olinishi va muhofaza hududlariga chiqindilar joylashtirilishi holatlari yuzasidan nazorat yetarli darajada ta’minlanmagani ta’kidlandi.

 

Muhokamalar yakunida Toshkent viloyati Ekopolitsiyasi boshlig‘i o‘rinbosari hamda sakkizta tuman va shahar bo‘limlari boshliqlari egallab turgan lavozimidan ozod etildi.

 

Shu bilan birga, Toshkent viloyati Ekologiya bosh boshqarmasiga aniqlangan kamchiliklarni bartaraf etish bo‘yicha topshiriqlar berildi. Qoraqalpog‘iston Respublikasi, viloyatlar va Toshkent shahar ekologiya boshqarmalariga ham o‘z faoliyatini qayta tahlil qilish, nazorat samaradorligini oshirish va ekologik madaniyatni yuksaltirish yuzasidan vazifalar yuklatildi.

 

Qo‘mita ma’lumotiga ko‘ra, ekologik nazorat respublikaning boshqa hududlarida ham kuchaytirilgan bo‘lib, mas’uliyatsizlik holatlariga nisbatan qat’iy choralar ko‘riladi.