Andijonda bolasini urgani uchun erkak qo‘shnisining farzandini ayovsiz kaltakladi

 

Ijtimoiy tarmoqlarda voyaga yetmagan bolaga nisbatan jismoniy kuch ishlatilgani aks etgan videolar tarqalishi ortidan Ichki ishlar vazirligi Xavfsizlik xizmati mazkur holat yuzasidan rasmiy ma’lumot berdi.

 

Qayd etilishicha, joriy yil 18-iyun kuni soat 15:05 da Andijon viloyati Shahrixon tumanida yashovchi 46 yoshli fuqaro T.I. “102” qisqa raqamiga murojaat qilib, 9 yoshli o‘g‘liga tan jarohati yetkazilganini ma’lum qilgan. Murojaat ortidan ichki ishlar organlari xodimlari voqea joyiga yetib borib, holat yuzasidan surishtiruv ishlarini boshlagan.

 

Dastlabki ma’lumotlarga ko‘ra, 2016-yilda tug‘ilgan ikki nafar voyaga yetmagan bola o‘rtasida kelishmovchilik kelib chiqib, ular o‘zaro mushtlashib ketgan. Shundan so‘ng bolalardan birining otasi — 1988-yilda tug‘ilgan M.B. mojaroga aralashib, janjalni bartaraf etish o‘rniga qo‘shnisining farzandiga bir necha bor qo‘l ko‘targan.

 

Oqibatda 9 yoshli bola tan jarohati olgan.

 

Hozirda Shahrixon tumani ichki ishlar bo‘limi tomonidan mazkur holat yuzasidan tergovga qadar tekshiruv harakatlari olib borilmoqda. Voqeaning barcha tafsilotlari atroflicha o‘rganilib, yakuniy xulosalar asosida ishtirokchilarning xatti-harakatlariga qonunchilikda belgilangan tartibda huquqiy baho berilishi ma’lum qilindi.

 

Qo‘shimcha ma’lumotlar tekshiruv yakunlari bo‘yicha e’lon qilinadi.