Andijonda qariyb 2,5 kilogramm “gashish” musodara qilindi
Mazkur giyohvandlik vositalari mamlakat hududiga xorijdan kontrabanda yo‘li bilan olib kirilgan.
Davlat xavfsizlik xizmati, Ichki ishlar va Bojxona organlari xodimlari hamkorligida Andijon viloyatida o‘tkazilgan tezkor tadbirlar davomida qariyb 2,5 kilogramm “gashish” moddasi musodara qilindiBu haqda DXX Zamon.uz'ga ma'lum qildi.
Ma’lum qilinishicha, Asaka tumanida o‘tkazilgan tezkor tadbirda “Lasetti” rusumli avtomobil to‘xtatilib, ko‘zdan kechirilgan. Tekshiruv davomida Namangan va Marg‘ilon shaharlarida yashovchi 1970, 1981 va 1984-yillarda tug‘ilgan uch nafar fuqaroga tegishli bo‘lgan 2 kilogramm “gashish” moddasi aniqlanib, protsessual tartibda rasmiylashtirilgan.
Shuningdek, Marhamat tumanida o‘tkazilgan yana bir tezkor tadbirda Quva shahrida yashovchi, 1985-yilda tug‘ilgan fuqaro boshqaruvidagi “Cobalt” rusumli avtomashina ko‘zdan kechirilganda, undan 497 gramm “gashish” moddasi ashyoviy dalil sifatida olingan.
Qayd etilishicha, mazkur turdagi giyohvandlik vositalari mamlakat hududiga xorijdan kontrabanda yo‘li bilan olib kirilgan.
Hozirda har ikki holat yuzasidan gumonlanuvchilarga nisbatan jinoyat ishlari qo‘zg‘atilib, ularga nisbatan “qamoq” ehtiyot chorasi qo‘llangan. Tergov harakatlari davom ettirilmoqda.
