Chirchiqda kanalda oqib ketayotgan fuqaro qutqarib qolindi
Hushsiz holatda qirg‘oqqa olib chiqilgan shaxsga voqea joyida birinchi tibbiy yordam ko‘rsatildi.
Toshkent viloyatining Chirchiq shahrida Favqulodda vaziyatlar vazirligi qutqaruvchilari kanalga tushib ketgan fuqaroni qutqarib qoldi.
FVV ma’lumotiga ko‘ra, 19-iyun kuni soat 13:00 atrofida Chirchiq shahridagi “Sharq” mahallasi hududidan oqib o‘tuvchi Bo‘zsuv kanalida profilaktik xizmat olib borayotgan qutqaruvchilar suv oqimida harakatsiz holda oqib ketayotgan fuqaroni payqab qolgan.
Shundan so‘ng qutqaruvchilar zudlik bilan suvga tushib, fuqaroni qirg‘oqqa olib chiqqan. Hushsiz holatda bo‘lgan shaxsga voqea joyida birinchi tibbiy yordam ko‘rsatilgan.
Ma’lum bo‘lishicha, fuqaro ehtiyotsizlik oqibatida kanalga tushib ketgan. Suzishni bilmagani sababli kuchli suv oqimida oqib ketgan. Hozirda uning ahvoli yaxshi ekani bildirilmoqda.
FVV fuqarolarni suv havzalari yaqinida xavfsizlik qoidalariga qat’iy rioya qilishga chaqirdi.
