Nyu-Yorkdagi Times maydonida otishma sodir bo‘ldi

 

AQShning Nyu-York shahridagi eng gavjum maskanlardan biri bo‘lgan Times maydonida qurolli hujum yuz berdi. Bu haqda Fox 5 NY telekanali shahar politsiyasi ma’lumotlariga tayanib xabar berdi.

 

Associated Press agentligining huquq-tartibot organlari va o‘t o‘chirish xizmati ma’lumotlariga tayanib xabar berishicha, hodisa oqibatida kamida bir kishi jarohat olib, shifoxonaga yetkazilgan. Shuningdek, otishmada gumon qilinayotgan shaxs tezkor ravishda qo‘lga olingan.

 

Ijtimoiy tarmoqlarda tarqalgan videolarda qora kiyimdagi kamida ikki kishi gavjum hududda o‘q uzgani, o‘q ovozlaridan so‘ng esa atrofdagi odamlar vahima ichida turli tomonga qochib, boshpana izlay boshlagani aks etgan. Ayrim kadrlarda otishma politsiya avtomashinasidan bir necha metr narida sodir bo‘lgani ko‘rinadi.

 

Hodisa “Nyu-York Niks” basketbol jamoasining 53 yil ichida ilk bor NBA chempionligini qo‘lga kiritishi munosabati bilan o‘tkazilgan tantanali parad yakunlanganidan bir necha soat o‘tib yuz bergan.

 

Ayni paytda huquqni muhofaza qiluvchi organlar voqea tafsilotlarini o‘rganmoqda. Jarohatlanganlarning aniq soni va hodisaning sabablari yuzasidan tergov harakatlari davom etmoqda.

 

Eslatib o'tamiz, 15-aprel kuni Turkiyaning janubi-sharqidagi Qahramanmarash viloyatidagi maktabda yuz bergan otishmada to'qqiz kishi halok bo'lgan va 21 kishi jarohatlangan edi. 14-aprel kuni Shanliurfa viloyatidagi maktabda o'n to'qqiz kishi jarohat olgani xabar qilingan edi.