Qarshida sudya yordamchisi 2500 dollar pora bilan ushlandi
Sud xodimi fuqaroni MIB tizimida boshqa tumanga o‘tkazib qo‘yishni va’da qilib, pul talab qilgan.
Jinoyat ishlari bo‘yicha Qarshi tuman sudining sudya yordamchisi xizmat mavqeidan shaxsiy manfaat yo‘lida foydalanishga uringani fosh etildi. Bu haqda DXX Zamon.uz'ga malum qildi.
Aniqlanishicha, u Majburiy ijro byurosining Qashqadaryo viloyatidagi tuman bo‘limlaridan birida joriy yil may oyidan buyon faoliyat yuritayotgan fuqaroni go‘yoki o‘zining mansabdor tanishlari orqali ishga joylashtirib qo‘yganini ro‘kach qilgan. Shuningdek, kelgusida uni o‘ziga ma’qul bo‘lgan boshqa tuman MIB bo‘limiga o‘tkazib berishni va’da qilib, buning evaziga 2500 AQSH dollari talab qilgan.
Davlat xavfsizlik xizmati hamda Bosh prokuratura huzuridagi Iqtisodiy jinoyatlarga qarshi kurashish departamenti xodimlari hamkorligida o‘tkazilgan tezkor tadbir davomida sudya yordamchisi so‘ralgan pul mablag‘ini o‘z xizmat xonasida olayotgan vaqtida ashyoviy dalillar bilan qo‘lga olindi.
Mazkur holat yuzasidan unga nisbatan jinoyat ishi qo‘zg‘atilib, tergov harakatlari olib borilmoqda.
