Eron sulh buzilgani sababli Hormuz bo‘g‘ozini yopdi
IIQK Hormuz bo‘g‘ozi yopilganini e’lon qilib, kemalarni hududga yaqinlashmaslik haqida ogohlantirdi.
Eron Islom inqilobi qo‘riqchilari korpusi (IIQK) Hormuz bo‘g‘ozi yopilganini e’lon qildi va kemalarni ushbu strategik suv yo‘liga yaqinlashmaslik haqida ogohlantirdi. Bu haqda Reuters xabar berdi.
IIQKga ko‘ra, bo‘g‘ozning yopilishiga Isroilning Livandagi harbiy amaliyotlari hamda AQSHning sulh bo‘yicha majburiyatlarini bajarmagani sabab bo‘lgan. Korpus bo‘g‘ozga kirishga uringan kemalar xavf ostida qolishi mumkinligini ma’lum qildi.
Reutersga ko‘ra, Eronning yuqori darajadagi delegatsiyasi AQSH bilan muzokaralar o‘tkazish uchun Shveysariyaga jo‘nab ketdi. Delegatsiyaga parlament raisi va bosh muzokarachi Muhammad Bag‘ir G‘olibof rahbarlik qilmoqda. Uning tarkibiga tashqi ishlar vaziri Abbos Aroqchi, shuningdek, xavfsizlik, neft va moliya sohalari bo‘yicha yuqori martabali amaldorlar kiritilgan.
Shu bilan birga, AQSH Markaziy qo‘mondonligi (CENTCOM) Hormuz bo‘g‘ozi orqali kemalar harakati davom etayotganini ma’lum qildi. Qo‘mondonlikning bildirishicha, shanba kuni 55 ta savdo kemasi bo‘g‘ozdan o‘tgan va ular orqali 17 million barreldan ortiq neft jahon bozorlariga yetkazilgan. AQSH harbiylari xalqaro dengiz yo‘llarida navigatsiya xavfsizligini ta’minlashda davom etishini ta’kidladi.
Eron oliy rahbari Oyatulloh Mujtabo Xomanaiyning maslahatchisi Muhammad Moxber esa AQSHni Tehron va Vashington o‘rtasida tuzilgan 14 bandli muvaqqat kelishuvning birinchi shartini bajarmayotganlikda aybladi. Mazkur band barcha frontlarda, jumladan Livanda ham o‘t ochishni to‘xtatishni nazarda tutadi.
Shveysariyada bo‘lib o‘tishi kutilayotgan muzokaralar fonida Livandagi vaziyat keskinligicha qolmoqda. Isroil armiyasi va Eron tomonidan qo‘llab-quvvatlanadigan “Hizbulloh” harakati o‘rtasida hujumlar davom etmoqda. Livan fuqaro mudofaasi xizmati ma’lumotlariga ko‘ra, sulh kuchga kirganidan keyingi dastlabki soatlarda Isroil zarbalari oqibatida kamida 20 kishi halok bo‘lgan.
AQSH vitse-prezidenti JD Vens yaqin kunlarda Shveysariyaga yo‘l olishini ma’lum qilib, Vashington va Tehron o‘rtasidagi sulh saqlanib qolishiga umid bildirdi. U, shuningdek, Hormuz bo‘g‘ozi amalda yopilgani haqida tasdiqlangan ma’lumotlarga ega emasligini aytdi.
