Namanganda qalbaki 100 ming dollarni 40 ming dollarga sotayotganlar ushlandi
Qalbaki valyutalar xorijda tayyorlanib, aylanma yo‘llar orqali mamlakat hududiga olib kirilgan.
Namangan viloyatida o‘tkazilgan tezkor tadbir davomida qalbaki valyuta savdosi bilan shug‘ullangan shaxslar qo‘lga olindi. Bu haqda DXX Zamon.uz'ga ma'lum qildi.
Xususan, Yangiqo‘rg‘on tumanida yashovchi 1992 va 1995-yillarda tug‘ilgan fuqarolar hamda To‘raqo‘rg‘on tumanida istiqomat qiluvchi 1980-yilda tug‘ilgan shaxs xorijda tayyorlangan qalbaki 100 AQSH dollarlik kupyuralardan iborat jami 100 ming AQSH dollarini haqiqiy 40 ming AQSH dollariga sotishni rejalashtirgan.
Davlat xavfsizlik xizmatining Toshkent va Namangan viloyatlari bo‘yicha boshqarmalari hamda Iqtisodiy jinoyatlarga qarshi kurashish departamenti xodimlari hamkorligida o‘tkazilgan tezkor tadbirda mazkur shaxslar qalbaki 80 ming AQSH dollarini haqiqiy 40 ming AQSH dollariga sotayotgan vaqtida ashyoviy dalillar bilan qo‘lga olingan.
Tergovga qadar o‘tkazilgan tekshiruvlar davomida ushbu qalbaki valyutalar xorijda tayyorlanib, aylanma yo‘llar orqali mamlakat hududiga olib kirilgani aniqlandgan.
Hozirda mazkur holat yuzasidan jinoyat ishi qo‘zg‘atilgan bo‘lib, tergov harakatlari olib borilmoqda.
