Bloger Gonzo festivaldagi janjal sabab 5 sutkaga qamaldi va jarimaga tortildi
Bloger K-Vibe festivali qatnashchilarini ularning e’tirozlariga qaramay videoga olgan va tasvirlarni internetda tarqatgan.
Poytaxtda mashhur bloger, Gonzo taxallusi bilan tanilgan Geydar Aliyevga nisbatan ma’muriy jazo qo‘llanildi. Bu haqda Podrobno.uz xabar berdi.
Ma’lum qilinishicha, 13-iyun kuni Toshkent shahridagi Taras Shevchenko ko‘chasida Koreya madaniyatiga bag‘ishlangan K-Vibe festivali bo‘lib o‘tgan. Bloger tadbir davomida kimono kiygan holda jonli efir olib borgan va festival mehmonlari bilan suhbatlashgan.
Xabarlarga ko‘ra, mojaro ayrim festival qatnashchilarining blogerdan ularni videoga olmaslikni so‘raganidan keyin boshlangan. E’tirozlarga qaramay, bloger tasvirga olishni davom ettirgan. Shundan so‘ng u bilan fuqarolar o‘rtasida og‘zaki tortishuv yuzaga kelgan.
Vaziyatga ichki ishlar organlari hamda Milliy gvardiya xodimlari aralashgan. Dastlab blogerga tuman ichki ishlar bo‘limiga borish taklif qilingan, biroq suhbat davomida tomonlar o‘zaro kelishuvga erishgan. Shundan so‘ng Geydar Aliyev Milliy gvardiya xodimi hamrohligida qo‘yib yuborilgan va festival hududini tark etgan.
Biroq oradan bir necha kun o‘tib, unga nisbatan ma’muriy ish qo‘zg‘atilgan. Huquqni muhofaza qiluvchi organlar blogerning harakatlarida bezorilik hamda ichki ishlar organi xodimining qonuniy talablariga bo‘ysunmaslik alomatlarini aniqlagan.
Sud qaroriga ko‘ra, Geydar Aliyev 5 sutka muddatga ma’muriy qamoqqa olindi. Shuningdek, unga 5 baravar bazaviy hisoblash miqdori, ya’ni 2 million so‘m miqdorida jarima tayinlandi.
