JCH-2026: Yaponiya va Germaniyada g‘alaba, Kyurasao esa tarixiy ochkoni qo‘lga kiritdi
Yaponlarga mag‘lub bo‘lgan Tunis guruhdan chiqish imkoniyatini yo‘qotdi.
2026 yilgi Jahon chempionatining navbatdagi uchrashuvlari muxlislarga qiziqarli natijalarni taqdim etdi. Kunning eng yirik g‘alabalaridan biri Yaponiya hisobiga yozildi.
“F” guruhida Tunisga qarshi maydonga tushgan yaponlar raqibini 4:0 hisobida taslim etdi. Uchrashuvning 4-daqiqasidayoq Daichi Kamada hisobni ochgan bo‘lsa, birinchi bo‘lim o‘rtalarida Ayase Ueda ustunlikni mustahkamladi. Ikkinchi bo‘limda Junya Ito va yana bir bor Ueda gol urib, Osiyo vakillarining ishonchli g‘alabasini ta’minladi. Ushbu mag‘lubiyatdan so‘ng Tunis terma jamoasi guruhdan chiqish imkoniyatidan mahrum bo‘ldi.
“E” guruhida esa musobaqa debyutanti Kyurasao tarixiy natijaga erishdi. Ekvadorga qarshi kechgan bahsda hisob ochilmadi va tomonlar 0:0 hisobidagi durangga rozi bo‘lishdi. Natijada Dik Advokat shogirdlari Jahon chempionatlari tarixidagi ilk ochkosini qo‘lga kiritdi.
Guruhning yana bir uchrashuvida Germaniya Kot-d’Ivuar ustidan qiyin g‘alabani tantana qildi. Afrikaliklar Frank Kessiening goli evaziga hisobda oldinga chiqib olishdi. Ikkinchi bo‘limda zaxiradan maydonga tushgan Deniz Undav avval muvozanatni tikladi, so‘ngra qo‘shib berilgan daqiqalarda g‘alaba golini urib, nemislarga muhim uch ochkoni taqdim etdi. Yakuniy hisob — 2:1.
