Kanadalik 93 yoshli milliarder jinsiy zo‘ravonlik bo‘yicha aybdor deb topildi

Kanada sudi 93 yoshli milliarder, Magna International kompaniyasi asoschisi Frenk Stronaxni ikki nafar ayolga nisbatan jinsiy zo‘ravonlik va shilqimlik qilishda aybdor deb topdi. Bu haqda CBC News xabar berdi.

 

Jinoiy ish Toronto shahridagi Ontario oliy sudida ko‘rib chiqildi. Sud Frenk Stronaxni yuqoridagi ikki epizod bo‘yicha aybdor deb topdi, biroq unga qo‘yilgan yana uchta jinsiy zo‘ravonlik ayblovi bo‘yicha oqladi. Tadbirkorning o‘zi esa ayblovlarni rad etmoqda.

 

Sud materiallariga ko‘ra, jabrlanuvchilardan biri 1977-yilda Stronax uning yubkasini ko‘tarib, zo‘rlashga uringanini ma’lum qilgan. Sudya ayolning ko‘rsatmalarini asosan ishonchli deb topgan, biroq ayrim tafsilotlar to‘liq tasdiqlanmagani sababli holatni odobsiz xatti-harakat sifatida baholagan.

 

Yana bir ayolning bildirishicha, 1980-yillarda Stronax unga nisbatan shilqimlik qilgan. Ayolning so‘zlariga ko‘ra, kechki ovqatdan so‘ng biznesmen uni bir necha bor ushlab qolishga uringan.

 

Uchinchi da’vogar esa Stronaxni zo‘rlashda ayblagan, biroq sud ushbu epizod bo‘yicha dalillarni yetarli deb topmadi. Sudya voqealardan 40 yildan ortiq vaqt o‘tgani ko‘rsatmalar ishonchliligini baholashni murakkablashtirganini qayd etdi.

 

Forbes ma’lumotlariga ko‘ra, Frenk Stronaxning boyligi 2018-yilda 1,5 milliard dollarga baholangan. Unga nisbatan yakuniy hukm 17-sentyabr kuni e’lon qilinishi kutilmoqda.

 

Kanadada milliarder 2024-yil iyun oyida jinsiy jinoyatlar bo‘yicha ayblovlar ortidan hibsga olingan, keyinchalik esa ma’lum shartlar asosida ozod etilgan.