Qrimda aholi uchun yonilg‘i savdosi to‘xtatildi
Yonilg‘i endilikda faqat yarim orolning faoliyati va xavfsizligini ta’minlaydigan davlat idoralariga sotiladi.
Qrimda aholi va xususiy korxonalar uchun yoqilg‘i savdosi vaqtincha to‘xtatildi. Bu haqda yarimorol rahbari Sergey Aksyonovga tayanib, BBC xabar berdi.
Aksyonovning so‘zlariga ko‘ra, yonilg‘i endilikda faqat Qrimning faoliyati va xavfsizligini ta’minlaydigan davlat idoralariga sotiladi. Mazkur qaror Ukraina tomonidan Rossiya nazoratidagi hududlardagi logistika va neft infratuzilmasiga uyushtirilayotgan hujumlar fonida qabul qilingan.
Aksyonovning bildirishicha, Kerch shahridagi neft bazasiga dronlar bilan uyushtirilgan hujum oqibatida to‘rt kishi halok bo‘lgan, 28 kishi jarohat olgan. Ukraina prezidenti Volodimir Zelenskiy esa mazkur hujumni Rossiyaning harbiy harakatlariga javob sifatida baholagan.
Zelenskiy Ukraina kuchlari Rossiyaning Krasnodar o‘lkasidagi neft tashish logistika obyektlariga, shuningdek harbiy logistika va radar tizimlariga ham zarbalar berganini ma’lum qildi. Rossiya Mudofaa vazirligi esa bir kechada 239 ta Ukraina droni urib tushirilganini bildirgan.
Qrimda yuzaga kelgan yonilg‘i taqchilligi yarimorolning logistika tizimiga bosim kuchayganini ko‘rsatmoqda. Mahalliy hokimiyat yonilg‘i bozoridagi vaziyat bo‘yicha qo‘shimcha qarorlar keyinroq e’lon qilinishini ma’lum qilgan.
So‘nggi oylarda Rossiya va Ukraina o‘rtasidagi hujumlar keskinlashib, tomonlar bir-birining harbiy va energetika infratuzilmasini nishonga olishni davom ettirmoqda.
