Tomskdagi koloniyada saqlanayotgan o‘zbekistonliklar holidan xabar olindi

O‘zbekistonning Novosibirsk shahridagi Bosh konsulxonasi diplomatlari Rossiyaning Tomsk viloyatida joylashgan 3-sonli axloq tuzatish koloniyasiga tashrif buyurdi. Bu haqda “Dunyo” axborot agentligi xabar berdi.

 

Ma’lum qilinishicha, mazkur muassasada Rossiya Jinoyat kodeksining turli moddalari bilan hukm qilingan 70 nafarga yaqin O‘zbekiston fuqarosi jazo muddatini o‘tamoqda.

 

Tashrif davomida vatandoshlarning murojaatlari, taklif va iltimoslari tinglanib, ularni qiziqtirgan masalalar yuzasidan huquqiy tushuntirishlar berildi. 

 

Shuningdek, xorijiy davlatlar hududidagi harbiy harakatlarda ishtirok etganlik uchun O‘zbekiston qonunchiligida jinoiy javobgarlik belgilanganligi eslatildi.

 

Diplomatlar tomonidan bir qator amaliy masalalar ham joyida hal etildi. Xususan, astma kasalligidan aziyat chekayotgan fuqaroning zarur tibbiy yordam olishi ta’minlandi, ikki nafar o‘zbekistonlikdan yangi pasport rasmiylashtirish bo‘yicha arizalar qabul qilindi.

 

Bundan tashqari, joriy yil may oyida koloniyadan ozodlikka chiqqanidan so‘ng yaqinlari bilan aloqasi uzilgan o‘zbekistonlik fuqaroning manzili aniqlanib, bu haqda uning oila a’zolariga ma’lumot berildi.

 

Qayd etilishicha, O‘zbekistonning Novosibirskdagi Bosh konsulxonasi Rossiyaning Sibir federal okrugidagi yurtdoshlarning huquq va qonuniy manfaatlarini himoya qilish hamda ularga konsullik-huquqiy yordam ko‘rsatish bo‘yicha ishlarni davom ettirmoqda.