AQSh va Eron muzokaralarini kuzatish uchun maxsus qo‘mita tuziladi
Delegatsiyalar rahbarlari unga muntazam ravishda hisobot berishlari rejalashtirilgan.
Shveytsariyaning Byurgenstok shahrida o‘tkazilgan AQSh va Eron o‘rtasidagi to‘rt tomonlama maslahatlashuvlar yakuniga ko‘ra, muzokaralar jarayonini kuzatib borish uchun maxsus yuqori darajadagi qo‘mita tuzishga kelishib olindi.
Qatar va Pokiston tomonidan tarqatilgan qo‘shma bayonotga ko‘ra, ushbu qo‘mita muzokaralar ustidan siyosiy nazoratni ta’minlash va kelishuvlarning samarali amalga oshirilishini monitoring qilish bilan shug‘ullanadi.
Qayd etilishicha, muzokara guruhlari rahbarlari qo‘mitaga muntazam ravishda hisobot taqdim etib boradi. Shuningdek, yadroviy masalalar, sanksiyalar hamda nizolarni hal etish bo‘yicha ishchi guruhlar faoliyati yo‘lga qo‘yiladi.
Yangi mexanizm muzokaralar jarayonining uzluksizligi va kelishuvlarning amaliy ijrosini ta’minlashga xizmat qilishi kutilmoqda.
